TUIR NAIN BA JESUS KRISTUS

REALIDADE BA MORIS ROAHN LAEK

HALO AN HANESAN,TUIR NAIN BA JESUS KRISTUS

Ema ne’ebe mak deklara nia an katak kristaun, nundar  tuir nain ba Nai Jesus Kristu mak ema ne’ebe ninia moris loron ba loron iha komuña ho Nai Jesus. Jesus mak ninia autor ba salvasaun, bensaun sira hotu no moris; fiar tebes katak Jesus kuidadu ninia moris no to’o iha loron ida sei ba moris hamutuk ho Nai Jesus no Anjo, santo sira iha Aman Maromak nia Reino, iha lalehan santo.

Ema ne’ebe tuir nain ba Jesus iha mundo ne’e, laos katak ema ne’e sempre moris diak/haksolok nune’e hela deit; ninia moris diferente ho ema seluk. Maibe, hatene katak hanesan ema humanu sei moris iha mundo, sempre hasoru susar ka problema sira hanesan mos ema seluk, tuir lei natureza humana katak ema hotu sala nain no sala ninia konsekuensia mak buat hirak ne’e: susar, terus, problema oin-oin deit, matan be’en (tanis), lakon/manan, iha inimigo/amigo, traisaun, moras oin-oin, mate no seluk seluk tan. Maibe hanoin hetan katak iha Biblia livro  Evanjello João 14:6 hateten katak: “Jesus mak dalan, lia lós no moris nian”. Se ita fiar tebes-tebes ba Nai Jesus mak nia ajuda ita iha tempo difícil sira ne’e no Lori ita ba iha fatin Aman maromak ninia Reino, lalehan santo iha fatin ba ó.

Se ita fiar ona ba Nai Jesus, ne’e dalan diak tebes no lalika laran susar ba buat susar no probelma sira ne’ebe ita hasoru iha mundo ida ne’e, tamba Jesus promete mai ita atu hamutuk ho ita loron ba loron, too mundo ne’e nia rohan, ita hetan pasajen ne’e iha bíblia livro Mateus 28:20b; ita iha razaun fiar nafatin ba Jesus Kristu iha sitausaun no kondisaun saída deit (tempo diak ka difícil). Entrega buat hotu iha ita nia moris ba Jesus no husik Nia mak kuidado ita nia moris, hahu iha momentu ne’ebe ita rekoñese ita nia sala no konfesa katak Jesus mak hanesan ita nia uniku sificiente salvador, fiar katak Nia sei ajuda no kuidado ita iha tmepo saída deit. Tamba Nia hadomi tebes ita ne’e mak Jesus fó tiha ona niNia moris tomak hodi mate no Nia ran fakar iha krus tan ita ema sala nain sira ne’e. Importante mak ita moris labele hadok-an husi Nai Jesus, halo ita nia moris hanesan Jesus nia evanjello no hanorin kona ba lia lós Jesus nian ba ema hotu no nafatin tuir nain ba Jesus. Iha Biblia livru João 14:2, Jesus hateten: “Iha Hau nia Aman nia uma, hela fatin barak; se laos nune’e karik, Hau hateten buat ne’e ba imi; basá Hau ba ne’eba atu prepara fatin ba imi”.

Jesus hatene katak ema hotu-hotu moris iha mundo mesak sala nain no moris provesorio iha mundo ne’e; maibe iha loron ida mak tempo to’o, ema ne’e husik ona mundo maka nia labele sés husi buat realidade ba moris rohan laek, tuir doutrina kristianismo. Wainhira Liu ba moris rohan laek nian mak ema ne’e sei ba hasoru terus rohan laek iha inferno (bele le’e iha ne’e: Apokalipse 1:18; Apokalipse 20:12-15; Lukas 16:18; Mateus 16:18), no ba hasoru haksolo rohan laek, iha Maromak Nia Reino (bele le’e iha ne’e: Apokalipse 21:3,4; Apokalipse 21:21-27; II Korintius 5:1; Markus 12:25; Apokalipse 2:7).

Tamba ne’e, ita sei moris ne’e mak iha oportunidade atu prepara ita idak-idak nia an, enkuantu sei iha tempo. Tamba liu tiha ida ne’e, laiha tan ona oportunidade ba ita atu buka Nai Jesus, maibe só iha Justisa tuir idak-idak nia hahalok.

Agora pára no hanoin didiak, se ita tuir nain ona ba Nai Jesus, kontinua ho fiar metin no karik mak durante ne’e ita hanesan rona deit kona ba Jesus maibe seidauk tuir nain Jesus karik, ida ne’e mak tempo, diak liu decide ona hodi entrega ita nia an ba Jesus agora no decide Nia tuir agora, tamba sei iha tempo ba ó no Jesus hadomi tebes ita.

KONEKTA NAFATIN BA JESUS

BUKA UNIAUN HO JESUS, AMAN MAROMAK NO EMA HOTU.

1. João 17:1-26 > Jesus nia orasaun ba Aman Maromak, ba Ninia – an, ba discípulo sira no ba ema sira ne’ebe mak rona testemuño evajello husi apostolu sira no simu Jesus hanesan sira uniku suficiente Salvador.

2. João 15:1-27 > Jesus mak videira hun, Aman Maromak mak tos Nain (Agrikultor), kristaun hotu-hotu liga ba Jesus.

3. Efésius 1:1-23 > Apostolu Paulu deklara katak Jesus mak autor ba Salavasaun no bensaun hotu no Nia mak igreja nia ulun. Ita hotu hanesan Jesus nia isin lolon, hadomi Malu, ajuda Malu iha tribulasaun (orasaun), Jesus mak adota ita tuir ninia vontade ba rikueza no bensaun sira hotu iha fatin celestial.

4. Romanus 12:1-21 > Kristaun sira hanesan Jesus nia isin lolon, hadomi Malu ho domin ne’ebe Laos falsu no kuidado Malu iha tempo hotu-hotu, halo diak ba ema ne’ebe halo aat ba ita.

5. I korintius 12:1-31 > Apostolu Paulu desperta igreja korintius katak individu ba membru kongregasaun idak-idak hanesan membru Kristu nia isin no simu diversidade Don (Maromak, Jesus no Esperito Santo ida) atu kopera malu ho dia hodi halao Maromak nia obra.

6. Efésius 4:1-32 > Unidade ba fé iha Kristu Jesus. Perdoa ba Malu, ajuda Malu no Fo bensaun ba Malu. Halo tuir modelo Kristu nian.