MAROMAK HALO BUAT HOTU IHA MUNDO NE'E NO HALO EMA KRIATURA TUIR NIA ILAS. MAROMAK HARE'E BUAT SIRA NE'E FURAK TEBES; HO KONTENTE NO FO BENSAUN. MAIBE, TAMBA DEIT EMA HALO SALA KONTRA NAI MAROMAK NO LA HALO TUIR MAROMAK NIA VONTADE MAK LORI SUSAR, MORAS OIN DEIT MAI IHA MUNDO NO TOO MATE. TAMBA NEE, LAIHA EMA IDA MAK ESKAPA HUSI MATE, IHA MUNDO NE'E.
Nai Maromak kria buat hotu - hotu iha Mundo ne'e furak teb-tebes (Gen. 1:31).
Foun-foun iha Jardin Eden, relasaun entre ema ho Maromak kapas tebes, la precisa em ruma sai hanesan intermedio entre ema ho Maromak; Tamba, Nai Maromak rasik hakbesik no visita sira iha Jardim (Gen. 3:8).
Maromak Nia hakarak ema halo tuir nia vontade iha Jardim nia laran; tamba ne'e, Nai Maromak fó hela ordem no proíbe ba Adaun katak sira labele han no nem kaer ai-fuan kona ba "koñesimento ba a'at no diak" iha jardim nia klaran; tamba, iha loron ne'ebe maka sira ku'u no han, mak sei mate (Gen. 2:16 e 17).
Iha loron ida, Eva lao mesak-mesak iha Jardim; iha loron ne'eba mosu ema ida naran tentador (Satanas) hahu halo perguntas lubuk ida hodi halo Eva duvida ba buat ne'ebe mak Nai Maromak proibe hela sira katak labele kaer no han. Maibe, Eva se'e tilun didiak ba tentador ne'e no Feto ne'e rasik haree ai-fuan furak tebes; Entaun, nia decide foti no han, depois lori mos ba Adaun han. Hahu husi ne'e, sira nai rua rasik sente moe no sala tiha ona no buka daln atu resolve problema ne'e; maibe sira foti decisaun mak halai no subar-an ba Maromak. Wainhira, Maromak tun visita sira nai rua iha Jardim Eden, maibe sira nai rua nafatin subar; entaun, Nai Maromak bolu Mane (Adaun), maibe Adaun hahu dún ka fó sala ba Feto no Feto mos fó dun ba Samea. Iha loron nee, Nai Maromak expulsa sira nain rua husi Jardim Eden no Nai Maormak tau fila fali Anjo hodi kuidado Jardim ne'e (Gen. 3:1-24). Hahu husi loron ne'eba, relasaun entre ema ho Nai Maromak kotu tiha. Maibe, Maromak nia grasa boot tebes ho laran luak hili familia ida (Abraun), atu sai husi nia aman nia rai no ba rai ida neebe Nai Maromak rasik sei hatudu ba nia atu adora no servi deit ba Nai Maromak mak Maromak rasik sei halo nia gerasaun sai nasaun boot ida no sei sai bensaun boot (Gen. 12:1 e 2). Abraun nia kaben Sara kous oan Mane ida no Abraun tau nia naran Isak (Gen. 21:2). Isak kaben ho Rebeka (Gen. 24:58-67); Isak no Rebeka, sira nai rua iha oan kaduak naran Esau no Jako (Gen. 25:21-34). Jako nia oan hamutuk nain sanolu resin tolu; husi mane nain sanolu resin rua no feto ida. Mane: Ruben, Simeaun, Levi, Judá, Dan, Naftali, Gade, Aser, Isakar, Zebulon, José no Benjamin. Feto: Diná (Gen. 29:32-35; Gen. 30:1-24 no Gen. 35:16-19). No Livro evanjello Mateus kapitulo ida versu ida too sanolu resin neen haktuir mai ita katak: Jesus Kristu mai husi linha Tribu Judá, gerasaun Liurai Davi nian.
Jesus Kristu mak uniku bele kasu no salava ema kriatura hotu-hotu, tamba Nia mak bibia-oan Maormak nian ne'ebe mak determina ona atu bele hasai ema hotu nia sala iha mundo (João 1:29); Jesus mak dalan uniku atu lori ema fiar nain sira ba Aman Maromak (João 14:6). Literalmente, wainhira ita lee iha evanjello hat nee (Mateus, Markus, Lukas no João), hatudu katak Jesus Kristu mai iha iha mundo atu hanorin povo ho lialos kona ba Aman Maormak nia reino no halo tuir Aman maromak nia vontade ba povo sira; iha okasiaun ne'e, Jesus mos halo milagre barak: kura moras oin-oin; delek bele haree; monok bele kolia no halo moris fila fali ema ne'ebe mate tiha ona. Buat sira ne'e hotu, Nai Jesus halo iha Ninia missaun ba salvasaun ema sala nain sira hotu. Milagre sira ne'ebe Nai Jesus halo hanesan simbolika ida hodi hatudu ba kriatura hotu katak ita precisa milagre esperitual atu hetan kura no moris foun iha ita nia moris esperitual ne'e rasik no loron ba loron atu ita iha esperansa, fé ba moris rohan laek iha Aman Maromak nia Reino. Tamba, la iha buat rohan laek ida mak ita iha mundo ne'e. Hanoin hetan katak, iha mundo ne'e laiha buat ida mak bele moris no hela too rohan laek; mabe, só iha Lalehan nai Maromak Nia Reino mak bele sai nunee. Nai Maromak konfirma liu husi revelasaun ba Apostolo João katak: "HAU mak Alfa no Ômega; Principiu no fim; dahuluk no ikus" (Apokalipse 22:13).
Jesus Kristu mai tiha ona iha mundo, hodi fo oportunidade ba ema sira ne'ebe arepende sira nia sala no tuir Nai Jesus no halo tuir Amana Maromak nia vontade mak ema ne'e bele hetan salavasaun no tama iha Aman maromak nia Reino.
Versikulo Bíbliku ba leitura:
- Geneses 3:22-24 - Maromak duni sai ema husi Jardim no tau fila fali Anjo ho espada kroat hodi hein Jardim Eden (Pekadu halo ema dook husi Maromak).
- João 3:1-18 - Maromak hatudu Ninia domin boot tebes ba ema sala nain (Pecador), maske ema la merece Maromak nia salavasaun, maibe Nai Maromak fó ho grasa tebes.
- Apokalipse 21:1-8 - Ema ne'ebe hetan salvasaun sei tama iha maromak nia Reino no moris rohan laek.
Maromak fo liberdade ba ema idak-idak hili dalan ida ne'ebe tuir nia hakarak, atu halo tuir Maromak nia vontade ka lae. Maibe, keta halua katak loron ikus, husi buat sira ne'ebe mak halo, ida ne'e mak sei determina atu moris haksolok rohan laek ka terus rohan laek. Entaun, tempo ida ne'e fó oportunidade diak mai ita atu decidi hodi hili dalan ida ne'ebe iha nia rohan diak mai ita. Keta haluan katak buat hotu iha mundo sempre iha ninia rohan, só uniku iha Maromak nia Reino mak rohan laek.
Liafuan ikus, keta halua katak buat salvasaun ba idak-idak nia klamar nee individual no responsabilidade ema idak-idak nian ho nai Maromak.
Xave ba salavasun mak arependementu/rekoñese ita nia sala ba Maromak.
M A R O M A K H A R A I K N I A G R A S A N O B E N S A U N B A I T.
